Andante aldizkariaren 114. zenbakia argitaratu da, eta azken hilabeteotan Donostiako Orfeoiak izan duen jarduera artistiko eta instituzional biziaren berri ematen du. Azalak Javier García Cogorro Fundacion Columbuseko patrono eta 2023ko Urrezko Danborrarekin egindako elkarrizketa jasotzen du. Bertan, musikak itxaropena sortzeko duen ahalmenaz hausnartzen du, eta Orfeoia «herri baten memoria emozionala gordetzen eta mundura kalitate apartaz zabaltzen duen» erakundetzat jotzen du. Ale honek, gainera, Orfeoiaren eta Fundación Columbusen arteko lankidetza aztertzen du RenHacer jaialdiaren bidez; musikaren, zientziaren eta elkartasunaren arteko lotura sendotzen duen ekimena da, gaixotasun ultraarraroen ikerketa bultzatzeko.
Argitalpenak Orfeoiaren azken jardueraren mugarri nagusiak ere biltzen ditu: Euskadiko Orkestrarekin eskainitako kontzertuak, Madrilgo Auditorio Nazionaleko emanaldiak, Oviedo eta Arantzazuko RenHacer Jaialdian izandako parte-hartzea eta Donostiako kultura- eta gizarte-bizitzarekin lotutako hainbat ekimen. Horrez gain, Alexander Liebreich zuzendariaren, Xabier Anduaga tenorearen eta Orfeoiko gazteen testigantzak jasotzen ditu, erakunde honetako kide izateak zer esan nahi duen lehen pertsonan azaltuz.
Andante-ren zenbaki berri honek berriro erakusten du Donostiako Orfeoiaren nortasun bikoitza: bikaintasun artistikoa eta gizartearekiko konpromisoa. Azken hiruhilekoko kontzertu, proiektu eta lankidetzen errepasoa egiteaz gain, datorren denboraldiko hitzordu nagusien aurrerapena ere eskaintzen du.
