Asteartea, Otsaila 3, 2015

Valentziako Erkidegoko Musika Elkarteen Federazioak (FSMCV) eta Miguel López Fernández ikertzaileak irabazi dute Donostiako Orfeoia – UPV/EHU Saria. Hamalaugarren edizioa duen saria bi helbururekin sortu zen: musika sortzaileen ibilbide profesionala aitortzea eta musika arloko ikerkuntza sustatzea. Epaimahaiak María Dolores Moreno Guil ikertzaileari accesit bat ematea erabaki du.

Epaimahaiak, bi erakundeek -Donostiako Orfeoia eta UPV/EHU- izenpetutako hitzarmenaren Jarraipen Batzordeak eratua, honakoak saritu ditu aurten: Valentziako Erkidegoko Musika Elkarteen Federazioa (FSMCV), musikaren arloan burutu duen lan eta ibilbide bikainagatik, eta Miguel López Fernández –musika ikerketaren saria– ‘La aplicación del Motu Proprio sobre la Música sagrada de Pío X en la Archidócesis de Sevilla 1903-1910' izeneko lanagatik. Halaber, María Dolores Moreno Guil ikertzaileari accesit bat ematea erabaki du ‘La canción con piano de Joaquín Rodrigo’ izeneko lanagatik.

Sariak martxoaren 13an, ostirala, arratsaldeko 19.00etan banatuko dira, UPV/EHUko Gipuzkoako Campuseko Ignacio María Barriola Ikastegiaren Auditorioan. Ekitaldi akademikoan hizlari izango dira José María Echarri, Donostiako Orfeoiko lehendakaria, eta Ana Arrieta, UPV/EHUko Gipuzkoako Campuseko errektoreordea. Ekitaldiaren amaieran Donostiako Orfeoiak bere errepertorio tradizionaleko konposizio batzuk eskainiko ditu jendearentzat.

x

Gure Cookie-ak eta bitartekoenak erabiltzen ditugu nabigazio zerbitzua hobetu eta erabiltzailearen nabigazio lehentasunen arabera publizitatea erakusteko. Nabigatzen jarraitzen baduzu, hauen erabilera onartzen duzula ulertuko dugu.
Zure baimena atzera bota edo informazio gehiago nahi baduzu, kontsultatu gure Cookie Politika.